Fuxir – Pelayo Martínez Olay

Descripción

Fuxir. Esi ye’l títulu qu’axunta esti conxuntu de rellatos, la pallabra que sirve como filu pa caminar d’ún a otru. Fuxir. ¿De qué? La razón qu’esplica estes fueyes, estes narraciones curties, ye tan personal como’l tiempu, l’esfuerciu y el ciñu que l’autor dedicó a caúna de les cincuenta y dos hestories que completen esta obra. El “Proyeutu 52 rellatos” —títulu secu (y) inicial— llegó al cume con ésitu. Y, dos años depués, escribir forma parte otra vuelta de l’allegría cotidiana del autor. El problema sigue presente, anque nun-y quede malapenes fuercia. Nun se pue baxar la guardia, el xiblíu arbitral tovía nun sonó, pero yá se nota l’aliendu de la victoria.

Pelayo Martínez Olái (Llangréu, 1997) vive en Sama, nel mesmu conceyu onde nació. Graduáu en Llingües Modernes y les sos Lliteratures pola Universidá d’Uviéu, formación académica qu’indica la so pasión polos idiomes, trabaya como profesor de Llingua Asturiana y Lliteratura n’Educación Secundaria.

Namoráu de la lliteratura, el rellatu curtiu ye’l rexistru nel que más cómodu se siente, como amuesen dalgunos reconocimientos qu’algamó en distintos concursos, como Ello yera una vegada, Entaína a escribir, Ensin muyeres nun hai idiomes, La voz del barrio o Vaqueiros.