Descripción

El cartafueyu d’Alquimia cunta la hestoria de dos hermanos mellizos, Damián y Calista, que viven una vida tranquila hasta que reciben la herencia del so tíu güelu Pachu. Ye una novela p’adolescentes que trata con aciertu les rellaciones familiares de dos hermanos que descubren un secretu sobre la so identidá.

Blanca Fernández Quintana ñaz en Bimenes en 1994. Ye graduada n’Estudios Clásicos y Románicos con minor n’asturianu. Collaboró cola revista de lliteratura n’asturianu Formientu con dellos rellatos.

Foi mención especial nel V concursu lliterariu Atrévete, convocáu pola Unión Xeneral de Trabayadores. En 2012, ganó’l V Concursu de Rellatos Curtios de la Fundación Cultural Asturies, cola obra L’home les caparines. Esi mesmu añu, recibía’l tercer premiu nel XIV Concursu Fernando Belmonte y en 2018 llogró’l segundu puestu nel mesmu certame cola obra Eutopos. En 2021 algamó’l premiu Radagast de Lliteratura Fantástica, Ciencia Ficción y Terror cola novela Trovadoresca y esi mesmu añu ganó’l primer premiu Enriqueta González Rubín con No que cinca los seres de lleenda . En 2022 foi la ganadora del XV premiu Xosefa Canellada de lliteratura infantil y xuvenil, promovíu pola Conseyería de Cultura, Política Llingüística y Turismu, con El cartafueyu d’Alquimia.